ತೈವಾನ್ ಅಧ್ಯಕ್ಷ ತ್ಸಾಯಿ ಇಂಗ್ ವೆನ್ ಅಮೆರಿಕ ಪ್ರವಾಸ ಮುಗಿಸಿ ಹಿಂದಿರುಗಿದ್ದಾರೆ. ಆದರೆ ಇದನ್ನು ಸಹಿಸದ ಚೀನಾ ತೈವಾನ್ ಸುತ್ತಲಿನ ಸಮುದ್ರ ಪ್ರದೇಶದಲ್ಲಿ 3 ದಿನಗಳ ಮಿಲಿಟರಿ ತಾಲೀಮು ಪ್ರಾರಂಭಿಸುವುದಾಗಿ ಶನಿವಾರ ಘೋಷಿಸಿದೆ.ತೈವಾನ್ ಅಧ್ಯಕ್ಷ ಅಮೆರಿಕದಿಂದ ಹಿಂದಿರುಗಿದ ಒಂದು ದಿನದ ಬಳಿಕವಷ್ಟೇ ಚೀನಾ ತೈವಾನ್ ಸುತ್ತ ಮಿಲಿಟರಿ ತಾಲೀಮು ಪ್ರಾರಂಭಿಸಿದೆ. ಪೀಪಲ್ಸ್ ಲಿಬರೇಶನ್ ಆರ್ಮಿಯ ಈಸ್ಟರ್ನ್ ಥೀಯೇಟರ್ ಕಮಾಂಡ್ ಯುನೈಟೆಡ್ ಶಾರ್ಪ್ ಸ್ವೀರ್ಡ್ ಏಪ್ರಿಲ್ 8 ರಿಂದ 10 ರವರೆಗೆ ಯುದ್ಧ ತಯಾರಿ ನಡೆಸುತ್ತಿದೆ ಎಂದು ಹೇಳಿದೆ. ತೈವಾನ್‌ನ ರಕ್ಷಣಾ ಸಚಿವಾಲಯ ತನ್ನ ದ್ವೀಪದ ಸುತ್ತಲೂ 13 ಚೀನಾದ ವಿಮಾನಗಳು ಮತ್ತು 3 ಯುದ್ಧನೌಕೆಗಳನ್ನು ಪತ್ತೆಹಚ್ಚಿರುವುದಾಗಿ ತಿಳಿಸಿದೆ. ಅಮೆರಿಕದ ಹೌಸ್ ಸ್ಪೀಕರ್ ಹಾಗೂ ತೈವಾನ್ ಅಧ್ಯಕ್ಷರ ನಡುವೆ ಸಭೆ ನಡೆದ ಬಳಿಕ ಚೀನಾ ಗುರುವಾರ ತೈವಾನ್ ವಿರುದ್ಧ ಸೇಡು ತೀರಿಸಿಕೊಳ್ಳುವುದಾಗಿ ತಿಳಿಸಿದೆ. ಹಾಗೂ ಅಮೆರಿಕ ತಪ್ಪು ಮತ್ತು ಅಪಾಯಕಾರಿ ಹಾದಿಯಲ್ಲಿದೆ ಎಂದು ಎಚ್ಚರಿಸಿದೆ.